ਅੱਜ ਭਾਰਤੀ ਮਹਿਲਾ ਕ੍ਰਿਕਟ ਦੇ ਇਤਿਹਾਸ ਦੇ ਪੰਨਿਆਂ ਵਿੱਚ ਸੁਨਹਿਰੀ ਦਿਨ

ਨਵੀਂ ਦਿੱਲੀ : ਅੱਜ ਭਾਵ 24 ਦਸੰਬਰ ਦਾ ਦਿਨ ਭਾਰਤੀ ਮਹਿਲਾ ਕ੍ਰਿਕਟ ਦੇ ਇਤਿਹਾਸ ਦੇ ਪੰਨਿਆਂ ਵਿੱਚ ਸੁਨਹਿਰੀ ਸ਼ਬਦਾਂ ਵਿੱਚ ਦਰਜ ਹੈ । ਦਰਅਸਲ ਮੁੰਬਈ ਦੇ ਵਾਨਖੇੜੇ ਸਟੇਡੀਅਮ ‘ਚ ਆਸਟ੍ਰੇਲੀਆ ਖਿਲਾਫ ਖੇਡੇ ਗਏ ਇਕਲੌਤੇ ਟੈਸਟ ‘ਚ ਭਾਰਤ ਨੇ 8 ਵਿਕਟਾਂ ਨਾਲ ਜਿੱਤ ਦਰਜ ਕੀਤੀ ਸੀ। ਭਾਰਤੀ ਮਹਿਲਾ ਟੀਮ ਦੀ ਲਾਲ ਗੇਂਦ ਕ੍ਰਿਕਟ ਵਿੱਚ ਕੰਗਾਰੂਆਂ ਖ਼ਿਲਾਫ਼ ਇਹ ਪਹਿਲੀ ਜਿੱਤ ਹੈ। ਪਰ ਕੀ ਤੁਸੀਂ ਜਾਣਦੇ ਹੋ ਕਿ ਪੁਰਸ਼ ਟੀਮ ਨੇ ਆਸਟ੍ਰੇਲੀਆ ਦੇ ਖਿਲਾਫ ਆਪਣੀ ਪਹਿਲੀ ਟੈਸਟ ਜਿੱਤ ਕਦੋਂ ਦਰਜ ਕੀਤੀ ਸੀ?

ਸ਼ਾਇਦ ਨਹੀਂ… ਤੁਹਾਡੀ ਜਾਣਕਾਰੀ ਲਈ, 1959 ਵਿੱਚ ਅੱਜ ਦੇ ਦਿਨ ਹੀ ਪੁਰਸ਼ ਟੀਮ ਨੇ ਵੀ ਪਹਿਲੀ ਵਾਰ ਆਸਟਰੇਲੀਆ ਨੂੰ ਹਰਾਇਆ ਸੀ। ਜੀ ਹਾਂ, 24 ਦਸੰਬਰ ਨੂੰ ਹੀ ਭਾਰਤੀ ਪੁਰਸ਼ ਟੀਮ ਨੇ ਵੀ ਆਸਟ੍ਰੇਲੀਆ ਖਿਲਾਫ ਆਪਣੀ ਪਹਿਲੀ ਜਿੱਤ ਦਰਜ ਕੀਤੀ ਸੀ। ਇਹ ਤੱਥ ਥੋੜਾ ਹੈਰਾਨੀਜਨਕ ਹੈ, ਪਰ ਇਹ ਸੱਚ ਹੈ।

ਗੁਲਾਬਰਾਏ ਰਾਮਚੰਦ ਦੀ ਅਗਵਾਈ ਵਿੱਚ ਭਾਰਤ ਨੇ 1959 ਵਿੱਚ ਆਸਟਰੇਲੀਆ ਨੂੰ ਪਹਿਲੀ ਵਾਰ ਟੈਸਟ ਕ੍ਰਿਕਟ ਵਿੱਚ ਹਰਾਇਆ ਸੀ। ਜਸੂਭਾਈ ਪਟੇਲ ਦੀ ਸ਼ਾਨਦਾਰ ਗੇਂਦਬਾਜ਼ੀ ਦੇ ਦਮ ‘ਤੇ ਭਾਰਤ ਇਹ ਇਤਿਹਾਸ ਰਚਣ ‘ਚ ਸਫਲ ਰਿਹਾ। ਉਸ ਮੈਚ ਵਿੱਚ ਭਾਰਤ ਨੇ ਕੰਗਾਰੂਆਂ ਨੂੰ 119 ਦੌੜਾਂ ਨਾਲ ਹਰਾਇਆ ਸੀ। ਜਸੂਭਾਈ ਪਟੇਲ ਨੇ ਇਸ ਦੌਰਾਨ ਕੁੱਲ 14 ਵਿਕਟਾਂ ਲਈਆਂ ਸਨ ਅਤੇ ਉਹ ਭਾਰਤ ਦੀ ਜਿੱਤ ਦੇ ਹੀਰੋ ਬਣੇ ਸਨ।

ਸਪਿੰਨਰ ਸਨੇਹ ਰਾਣਾ ਨੇ ਮਹਿਲਾ ਕ੍ਰਿਕਟ ਵਿੱਚ ਇਹ ਭੂਮਿਕਾ ਨਿਭਾਈ। ਇਸ ਆਫ ਸਪਿਨਰ ਨੇ ਪਹਿਲੀ ਪਾਰੀ ਵਿੱਚ ਤਿੰਨ ਅਤੇ ਦੂਜੀ ਪਾਰੀ ਵਿੱਚ ਚਾਰ ਵਿਕਟਾਂ ਲੈ ਕੇ ਕੁੱਲ 7 ਵਿਕਟਾਂ ਲਈਆਂ। ਸਨੇਹ ਰਾਣਾ ਨੂੰ ਇਸ ਸ਼ਾਨਦਾਰ ਪ੍ਰਦਰਸ਼ਨ ਲਈ ਪਲੇਅਰ ਆਫ ਦਾ ਮੈਚ ਦਾ ਐਵਾਰਡ ਦਿੱਤਾ ਗਿਆ।

ਮੈਚ ਦੀ ਗੱਲ ਕਰੀਏ ਤਾਂ ਟਾਸ ਜਿੱਤ ਕੇ ਪਹਿਲਾਂ ਬੱਲੇਬਾਜ਼ੀ ਕਰਨ ਆਈ ਆਸਟ੍ਰੇਲੀਆਈ ਟੀਮ ਪਹਿਲੀ ਪਾਰੀ ‘ਚ 219 ਦੌੜਾਂ ‘ਤੇ ਆਲ ਆਊਟ ਹੋ ਗਈ। ਟਾਹਲੀਆ ਮੈਕਗ੍ਰਾ ਅਰਧ ਸੈਂਕੜਾ ਬਣਾਉਣ ਵਾਲੀ ਇਕਲੌਤੀ ਬੱਲੇਬਾਜ਼ ਸੀ। ਭਾਰਤ ਲਈ ਪੂਜਾ ਵਸਤਰਕਾਰ ਨੇ 4 ਅਤੇ ਸਨੇਹ ਰਾਣਾ ਨੇ 3 ਵਿਕਟਾਂ ਲਈਆਂ।ਇਸ ਦੌਰਾਨ ਦੀਪਤੀ ਸ਼ਰਮਾ ਨੂੰ ਦੋ ਸਫਲਤਾਵਾਂ ਵੀ ਮਿਲੀਆਂ।

ਆਸਟ੍ਰੇਲੀਆ ਦੀਆਂ 219 ਦੌੜਾਂ ਦੇ ਸਾਹਮਣੇ ਭਾਰਤ ਨੇ ਪਹਿਲੀ ਪਾਰੀ ‘ਚ ਸਮ੍ਰਿਤੀ ਮੰਧਾਨਾ (74), ਰਿਚਾ ਘੋਸ਼ (52), ਜੇਮਿਮਾ ਰੌਡਰਿਗਜ਼ (73) ਅਤੇ ਦੀਪਤੀ ਸ਼ਰਮਾ (78) ਦੇ ਅਰਧ ਸੈਂਕੜਿਆਂ ਦੇ ਆਧਾਰ ‘ਤੇ 406 ਦੌੜਾਂ ਬਣਾਈਆਂ।ਭਾਰਤ ਨੇ ਪਹਿਲੀ ਪਾਰੀ ਤੋਂ ਬਾਅਦ ਮਹਿਮਾਨਾਂ ‘ਤੇ 187 ਦੌੜਾਂ ਦੀ ਲੀਡ ਲੈ ਲਈ।

ਆਸਟ੍ਰੇਲੀਆ ਦੂਜੀ ਪਾਰੀ ‘ਚ ਭਾਰਤ ਨੂੰ ਸਿਰਫ 74 ਦੌੜਾਂ ਨਾਲ ਪਛਾੜ ਸਕਿਆ ਅਤੇ ਪੂਰੀ ਟੀਮ 261 ਦੇ ਸਕੋਰ ‘ਤੇ ਸਿਮਟ ਗਈ। ਭਾਰਤ ਨੇ ਇਹ ਸਕੋਰ 2 ਵਿਕਟਾਂ ਗੁਆ ਕੇ ਹਾਸਲ ਕਰ ਲਿਆ ਅਤੇ ਇਤਿਹਾਸ ਰਚ ਦਿੱਤਾ।